وصفات طبيعية لاستقبال رمضان

السلام عليكم ورحمة الله وبركاته

البنات رمضان على الأبواب والوقت فيه للعبادة والأذكار والدعاء لهذا بغيتك ديري هاذ جوج وصفات لي نتيجتها خيال والتجربة خير برهان
الوصفتين ساهلة ماهلة ترطيب خطير واشراقة وتفتيح وشد للبشرة وإزالة التجاعيد لي جايا وبغات دير لك منعرجات  
هاذ الوصفات صالحة لكل أنواع البشرة

الوصفة الاولى ضد التجاعيد ومرطبة للبشرة وتفتحها

2معالق رقائق الشوفان وكأس صغير الماء حطيهم فوق النار ومع التحريك حتى تحصلي على خليط ابيض معلك ورطب غادي تخليه يبرد شوية وتاخذي ليبا  وتعصري فيها الخليط حتى يخرج لك بحال الكريم وذاك الشي لي بقى في الليبا ضيفي عليه معلقة السنيدة ومعلقة زيت بلدية وعملي به كوماج.
و العصارة ضيفي عليها  معلقة زيت اللوز الحلو و2 كبسولات فيتامينe خلطي مزيان المكونات وديريهم في علبة وطبقي بعدما تنظفي البشرة وديري به مساج من الأسفل للفوق في اتجاه الخارج والباقي احتفظي به في الثلاجة حتى تكمليه استعمليه كل نهار خليه على البشرة حتى ينشف وزوليه ، والى بغيتي نتيجة واعرة ديريه جوج مرات في اليوم  غادي تلاحظي فرق كبير لون موحد للبشرة ونعومة يا سلام .


الوصفة الثانية أسهل ما يكون

2معالق روز ابيض المدور ماشي كلاصي +كاس الماء
تعمليهم فوق النار تخلي حتى يطيب الروز ويتعجن  من بعد طحنيه بالميكسور  وضيفي لو معلقة ص زيت اللوز و معلقة ص زيت كليسيرين و معلقة ص النشا وخلطي مزيان وطبقي القناع على البشرة بعدما تنظيفها يكرر يوميا حتى تكملي الكمية .
وهكذا ما يجي فين يحل علينا رمضان حتى تلقاي راسك منورة بنور الله ومستعدة روحا وروحيا  لاستقبال شهر الرحمة والبركة  
وبالصحة والراحة
غدا نبداوا في القناع الأول ومن بعد نديروا الثاني وهكذا تكونوا انيقات جميلات نشيطات متحمسات لكل ما هو مفيد وجميل  مع تحياتي

اله يعطبك الصحة الماسكات واعرة ..ان شاء الله نطبقوهم ونشوفو الوجه مفتح ومنور نهار عيد الفطر ان شاء الله